Kəmalə Rəhimli  O Qara gözlərə vurulmusham

Kəmalə Nağı qızı Rəhimli  oxuyanda sanki başqa aləmdə olur, məlahətli səsi qeybdən gəlir, dinləyəni uzaqlara -  hiylə, riya olmayan, yalnız saf məhəbbət, azad dünya, möcüzəli bir aləmə aparır. Saatlarla dinləsən də, yenə dinləmək istəyirsən bu sehrli-sirli səsi. Xoş və həzin səsi sanki mahnıların və muğamların boyuna biçilib. Sirli-sehrli nəfəsi eşidəni öz cazibə sahəsindən kənara buraxmır, dinlədikcə dinləmək istəyirsən. Sadə el deyimi ilə desək “səsi insanın iliyinə, sümüyünə işləyir”. Bu sehrli səs hamımızın sevimlisi, yüz minlərlə insanların pərəstiş etdiyi, sevdiyi, sevə-sevə dinlədiyi Kəmalə xanım Rəhimliyə aiddir. Kəmalə Nağı qızı Rəhimli 1952-ci il oktyabrın 5-də Qala kəndində dünyaya gəlib. Orta məktəbi Bakı şəhərində bitirib. 1971-ci ildə Asəf Zeynallı adına Musiqi Məktəbinin muğamat və xalq mahnıları şöbəsinə daxil olub və 1975-ci ildə həmin məktəbi bitirib. Onun müəllimləri Əhməd Bakıxanov, Şəmsi Kərimov, Hacıbaba Hüseynov, Nəriman Əliyev və bir sıra görkəmli sənət korifeyləri olmuşdur. Kəmalə xanımın səhnəyə ilk gəlişi “Lalə” qızlar ansamblından başlayıb. Sonrakı illərdə o, Azərbaycan Dövlət Filarmoniyasının solisti, Ağasi Məşədibəyovun rəhbərlik etdiyi ansamblda çalışıb. K. Rəhimli 1980-ci ildə korifey sənətkarımız Rəşid Behbudovun dəvəti ilə onunla birgə səhnə fəaliyyətində çalışıb. 2000-ci ildə isə Moskva şəhərində Nəsibə Zeynalova adına Azərbaycan Dövlət teatrının yaradıcılarından biri olub. Özünəməxsus ifa tərzi ilə ürəklərə yol tapan müğənni Asiya, Avropa, Almaniya, Rusiya, Müstəqil Dövlətlər Birliyinin bütün ölkələrində qastrol səfərlərində olub. K. Rəhimli “Ostankino” televiziyasının “Sehrli səs” mükafatı və diplomu ilə təltif olunub.2006-cı ildə Azərbaycan Respublikası prezidentinin fərmanına əsasən Kəmalə Nağı qızı Rəhimliyə Azərbaycan Respublikasının “Əməkdar artisti” fəxri adı verilib.

Əslən İsmayıllının Yuxarı Cülyan kəndindən olan Bəyimxanım Ənvər qızı Mirzəyeva 1989-cu il sentyabrın 20-də anadan olub. Lap körpəlikdən ifaçılığa, xüsusən, muğama meylliliyi aşkar hiss olunub. 2-3 yaşlarında olarkən televiziyada muğam səsləndiriləndə həmişə kənarda ağlayırmış. Artıq 3 yaşından Ə.Cavanşirovun “Bənövşə” uşaq xorunda solist kimi çıxış edərək sənətdə ilk addımlarını atıb. Elə o vaxtlar televiziyada ilk çıxışı rəğbətlə qarşılanıb. Sonradan Uşaq Filarmoniyasında sənətini davam etdirib, Zabit Nəbizadə kimi mahir ifaçıdan ecazkar səs dünyasının sirlərini öyrənib. Bəyimxanım xalq artistləri  İslam Rzayev və Əlibaba  Məmmədovun təklifi ilə Bülbül adına orta ixtisas musiqi məktəbinə qəbul edilib, xalq artisti Ağaxan Abdullayevin sinfində muğamın incəliklərini öyrənib. Müxtəlif muğam müsabiqələrində uğurla çıxış edib: Fransa, Almaniya, Türkiyə, Ukrayna, Qırğızıstan... Bəyimxanımın muğam səyahətlərinin coğrafiyası genişlənməkdədir. Bir çox muğamlarımızı məharətlə ifa edən Bəyimxanım əsl sənətkarlara xas özünə qarşı tələbkarlıqla yanaşır, daim üzərində çalışır, kamil sənətə doğru inamla irəliləyir.